دليلك لإستخدام الألوان في الإعلانات
طول الوقت بنتكلم عن معاني الألوان في المطلق
، في الورد مثلا ، او حتى في تأثيرها على حالاتنا النفسية.
فأكيد لما نيجي نتكلم عن التسويق
، يبقى لازم ناخد فى الاعتبار لغة الألوان و تأثيرها فى تسويق المنتج ودرجة وصوله
للناس .
خلينا نبدأ من الاول خالص .. انت براند جديدة ، عايز تعمل شخصية للمنتج
بتاعك ، وتصمم لوجو ملفت و مثير للإنتباه … يبقى لازم اول حاجة هاتفكر فيها في
المرحلة دي هي لونك.
طيب .. خلونا نتكلم شوية عن الألوان وتأثيرها على الشخص وبالتالي
مناسبتها للمنتج بتاعك:
1- الأحمر:
دلالاته
– بيلعب على المشاعر والشغف ، بيزود ضغط الدم
و بيزود معدل ضربات القلب و كمان بيأثر على الاعصاب .
–
طبعا هو اللون المتعارف عليه للدلالة على الحب و بالتالي استخدامه بيفيد جدا في
ربط العميل عاطفيا بالمنتج على المدى الطويل.
– ومن الدلالات المهمة للون دا هو انه بيخلق
جو العميل شعور بالضرورة ، يعني في عقله الباطن العميل بيحس انه محتاج المنتج
دا ، مش عايزه .. لأ محتاجه.
# تستخدمه امتى …؟
–
لأن الأحمر لون بيأثر على المشاعر و الرغبة ، فهو مناسب جدا لو منتجك عبارة عن
مطعم – خاصة الوجبات السريعة – او كافيه .
– تخلق حاجة للمنتج او الخدمة اللي بتقدمهم
خاصة لو الحاجة دي غير موجودة او نادرة في الشريحة اللي بتستهدفها من العملاء
# من أشهر البراندات اللي استخدمت
اللون دا ماكدونالدز ، فودافون
، و كوكاكولا ، كيت كات.
2- الأزرق:
دلالاته
– لون بيوحي بالسلام و الامان و السرية او
الخصوصية ، بيدي احساس بالثقة و كمان كتيرمن الشباب بيعتبروه لون بيدل على النضج .
– وببعض الملاحظة البسيطة هانلاقي ان الازرق
هو اكتر الالوان شيوعا بين الرجالة و هو اللون المفضل عند اغلبهم .
# تستخدمه امتى …؟
– لو منتجك موجه للرجاء بصفة أساسية .
– لو منتجك بيحتاج للإقناع و التحليل فى
تسويقه .
– لو بتعمل بريزنتشن لمديرك او مدير شركة و
كان رجل .
– لو عايز تأثر على مراكز الاحساس بالهدوء فى
العميل قبل ما تديله المنتج و دي خاصية ممكن تحتاجها فى المنتجات المعقدة او
الغالية او اللي هاتحتاج شرح كتير .
– لو عايز تدي احساس بالثقة فى منتجك / خدمتك
او بتبيع منتجات لها علاقة بالامان و السلامة
# من أشهر البراندات اللي استخدمت
اللون الازرق: فايس بوك ، تويتر
، ديل ، اتش بي ، فورد.
3- الاخضر:
دلالاته
– لون الطبيعة ، بيوحي بالإتزان و
التوازن في الحياة ، بيدي احساس بالسلام الداخلي و بيعلي شعورك بالإرتباط بالعناصر
الطبيعية فى الكون . لون للإمتنان و الشكر .
# تستخدمه امتى ..؟
– لو انت بتتبنى قضايا مجتمعية او قضايا دفاع
عن البيئة .
– لو بتقدم منتجات مكونة من عناصر طبيعية
سواء ماكولات او مشروبات او منتجات عناية بالصحة والبشرة .
– لو عندك محل او مكان بتقدم فيه منتجاتك /
خدماتك و عايز العملاء يحسوا بالاسترخاء فيه وبالتالي يقضوا فيه وقت اطول من
المعتاد .
– لو عندك موقع و عايز زوارك يضغطوا على لينك
معين او ينزلوا برنامج معين بالتالي الاخضر مثالي للإشارة للينك دا
# من أشهر البراندات اللي
استخدمت اللون الاخضر: سلسلة
مقاهي ستاربكس ، جمعية مصر الخير.
4- الأصفر و البرتقالي :
دلالاته
– على عكس السائد فالأصفر مالوش دعوة
بالغيرة فيما يخص التسويق ، وهو و البرتقالي بيشتركوا فى بعض الخصائص . الاتنين
بيدلوا على البهجة و التفاؤل ، بيحفزوا التفكير و الحماسة جوا العقل ، لكن لو
استخدموا بشكل مفرط فيه ممكن يولدوا احساس بالقلق خاصة الأصفر .
– الأصفر كمان ممكن يكون له تأثير سلبي شوية
على الأطفال ، لكن البرتقالي هايديهم احساس بالحذر .
# من البراندات اللي بتستخدم الأصفر
بحذر: ماكدونالدز و ناشيونال
جيوجرافيك. نيكون كمان استخدمته بمساحة اكبر لكن خففت من تأثيره العام من خلال
الخطوط البيضا فى وسط اللوجو الاصفر .
# اما البراندات اللي استخدمت
البرتقالي فمنها قناة نيكلوديون
، فانتا ، فايرفوكس وموقع بلوجر.
5- الأرجواني او البنفسجي:
دلالاته
– بيدل على الاحترام ، الحكمة ، علو الشأن ،
وكمان الإبداع .
# تستخدمه امتى ..؟
– لو انت بتقدم خدمة ابداعية او اداة بتساعد
على الابداع او بتتكلم عن منتجك على انه بيمثل الابداع في مجال معين .
– لو انت بتحاول تربط منتجك بالرقي و بشريحة
مستخدمين من اصحاب الثراء . او بتحاول تقول ان المنتج دا هايوصلهم للإحساس بالرقي
المنشود دا .
– لو بتحاول تروج فكرة انت عارف انت بتقول
ايه ، وانك متفرد في مجالك .
# من البراندات اللي استخدمت
البنفسجي كادبوري ، ياهو ،
باربي ، هالمارك ، Aspreyof london
, Adobe InDesign
6- الأسود:
دلالاته
– الأسود بيدل على السلطة ، القوة ،
الاستقرار و السيطرة .
# تستخدمه امتى ..؟
– لوعايز تدي فكرة انك ذكي او ان المنتج اللي
بتقدمه دا بيساعد العملاء انهم أذكى او بيظهروا شكل اذكى .
– ماتستخدموش بشكل مبالغ فيه لانه ممكن ينعكس
عليك ويدي احساس سلبي للعملاء لان الإكثار من الأسود بيولد احساس بالقهر و الغلبة
.
# من البراندات اللي بتستخدمه:
Puma , Nike , NewYork Times , Chanel
.
والحالة اللي شايفاها غريبة هي استخدامه فى
قناة الأطفال Cartoon network
7- الأبيض:
دلالاته
– مرتبط بالبراءة و النقاء ، و كمان الامان .
# تستخدمه امتى ..؟
– ممكن تستخدمه عشان لو انت بتقدم خدمة او
منتج وعايزتدي احساس بالشفافية و الصدق فى الكلام اللي بتقوله عن منتجك دا
– ممكن كمان تستخدمه عشان تدي لمحة بالإبداع
بما ان الابيض بيوحي بالنقاء و انك بتكلم على مية بيضا
# من البراندات اللي بتعتمد عليه بشكل رئيسي
ويكيبيديا ، وهوندا و اديداس و بي بي سي.
يعنى فيما معناه حاول تختار صح
علشان اختيار اللون المناسب للمنتج مهم جدا فى عملية التسويق .
حلو اوي .. كدا انا عرفت انا هاختار اللون اللي يعبر عن شخصية البراند
بتاعي .. مافيش مشكلة .. تؤ تؤ تؤ .. اصبر على رزقك .. وإسال نفسك السؤال دا .. هل
الفئة اللى انت بتبيع لها دي ستات ولا رجالة ..؟
بناء على الفئة اللي هاتوجه لها منتجك هاتحدد كمان اللون المناسب ..
ليه بقى .. لان الألوان اذواق:
# مثلا في الرجالة :
– لونهم المفضل هو الازرق ، و فيه دراسات
اثبتت انه اللون المفضل لـ 60 % منهم
– اقل الالوان تفضيلا عندهم هم البني و
البنفسجي و البرتقالي بنسب متقاربة مابين 22% لـ 25% .
– الرجالة بيحبوا الألوان الداكنة و المكثفة
و القوية
# اما الستات :
– لونهم المفضل كان الازرق 35% وبيتنافس معاه
بنسبة معقولة البنفسجي 23% .
– اقل الألوان تفضيلا كانوا البرتقالي و
البني و الرمادي و الاصفر
– الستات
طيب خلينا نقول نقطة اخيرة .. احنا تاعبين نفسنا ليه وقعادين
نحلل فى الالوان و تفضيلات الناس و كل الكلام الكتير دا .. ما انت هاتختار اى لون
على اى لوجو وربنا هايسهلها ان شاء الله .. المهم دعا الوالدين .. مش كدا برضو ..؟
هو اكيد دعا الوالدين مهم ، لكن مهم كمان انك
تبص على شوية الأرقام اللي جايين دول:
– 93 % من المستهلكين بيركزوا على الشكل
البصري للمنتج قبل ما يشتروه و بيتخذوا قرارهم بالشراء بناء عليه.
– 80 % من عملائك المحتملين بيقولوا لك انهم
بيشوفوا ان اللون هو المسؤل عن تحديد شخصية المنتج والبراند كلها.
– 52% من العملاء مش هايرجعوا للمحل تاني لو
ماعجبهمش شكله وطريقة تنسيقه .
– تقريبا 90 % منهم بيقولوا ان اللون هو
الحاجة الاساسية اللي بتجر رجليهم للمنتج عشان يهتموا بيه ويعرفوا عنه اكتر .
دكتور/أحمد عوض
