أساسيات تصميم اليفط الإعلانية

هنبتدى الكلام بايه هيا اليفط وايه اهميتها ونشرح كيفية التعامل مع العميل :

طبعا اليفط دى عباره عن الاعلان الثابت اللى بيعبر عن نوع النشاط اللى بيمارسه صاحب اليافطه
اهميتها طبعا انها بتعمل دعايه لصاحب النشاط فى دائرته .
بمعنى انك رايح لعنوان عياده دكتور واول مره تروح ولسه هتدور على مكان العياده
وانت واقف فى الشارع لقيت يافطه مكتوب عليها اسم العياده اللى انت بتدور عليها
يبقى كده اليافطه دى سهلت عليك انك تدور كتير
علشان كده اليفط مهمه جدا لاى صاحب نشاط ولا غنى عنها
مفيش حد بيفتح محل او مكتب او شركه الا واول حاجه بيفكر يعملها هيا اليافطه
عرفنا خلاص اهميه اليفط
نيجى بقى لانواع اليفط
اليفط منها ثلاث انواع هما الأكثر شيوعا
فيلكس وبانر وفنيل ... ألخ
الفيلكس دى عباره عن الخامه الجلد اللى بيتطبع عليها التصميم وبعد كده بتتشد على بوكس خشب وجواه لمبات علشان تنفذ يافته مضيئه
البانر بقى عباره عن الخامه الجلد اللى بيتطبع عليها التصميم برضه بس مش بينفع يتحط وراها لمبات وبتتعلق عادى
الفنيل ودى اليفط اللى مش بتتصمم بالالوان مثالها العادى قائمه الاسعار
احنا اللى يهمنا دلوقتى الفيلكس والبانر
لا وكمان دول مش مهمين
لان لما بيتطلب منك تصميم يافطه انت مش بيبقى ليك دعوه اليافطه دى حتتطبع فيلكس او بانر انت اللى يهمك تصممها وحكايه طباعتها لاى نوع بترجع للمطبعه مش ليك
معنى كده ان التصميم واحد لاى نوع من النوعين
نيجى بقى لحته تصميم اليافطه
اولا انت بتشوف المقاس المطلوب كام
يعنى مثلا لو 2 متر فى 1 متر
بتفتح صحفه جديده فى الفوتوشوب مقاس 200 سم فى 100 سم
الجديد بقى
ان الريزليوشن بيبقى 72 بيكسل فى الانش
إنما المطبوعات الورقيع زى الكروت  300 بيكسل فى الانش
معلومة مهمه :
ان فيه ناس كتير بتقول انهم يصمموا اليافطه على مقاس صغير عادى وليكن مقاس الكارت وبعد كده يكبروها على المقاس الكبير طبعا الكلام ده غلط .

اليافطه بتتصمم على مقاسها الاصلى والريزليوشن الاصلى علشان تطلع كويسه فى الطباعه لكن لما تيجى تصممها على مقاس صغير وتكبرها بعد كده ابقى اتفرج عليها حتبقى عامله ازاى فى الطباعه
اوك عرفنا المعلومه المهمه دى
نيجى بقى لنقطه مهمه جدا
ان المصمم اللى اول مره يصمم يافطه
اول حاجه بتواجهه
انه بيقول ازاى اعرف ان اسم النشاط اللى هكتبه هيطلع كبير لما اليافطه تتطبع
انا باقول ان اسم اليافطه ده هوه المؤشر اللى عن طريقه هتوزع بقيه البيانات وتظبط حجمهم
اولا تكتب اسم اليافطه وليكن ( نينجا نت ) زى ما انتوا شايفين فى اليافطه اللى تحت
تكتبها بمقاس كبير وبعرض اليافطه
فيه لوجو للمكان زى اللى فى اليافطه يبقى تحطه برضه بمقاس كبير لان اللوجو مهم جدا لصاحب المكان
ثانيا: تكتب بيانات اليافطه بمقاس اصغر شويه من اسمها وتوزعهم بشكل حلو حسب ذوقك وتحاول على قد ما تقدر يبقوا واضحين ( تحطهم فى مربعات دواير مثلثات تطلع نور منهم اتصرف)
ثالثا: اهتم اوى بالصور لان الصور دى اول حاجه هيشوفها الناس قبل البيانات وكمان بتعطى شكل لليافطه
يعنى يفطه زى اللى قدامكم فيها صور لالعاب زى ما انتوا شايفين
الفكره بقى اللى فى اليافطه دى اللى عاوزكم تاخدوا بالكم منها
انهم مقسومه نشاطين
اول نشاط اللعب والنت
وتانى نشاط الكمبيوتر والتجميع
علشان كده لاحظوا ان تم الفصل بين النشاطين بشكل لذيذ
معملناش خط علشان يفصل بينهم
لا جبنا صوره كمبيوتروكتبنا اسم المكان تانى بس جمبه كلمه كمبيوتر وفى مربع ومع شكل الكمبيوتر الحلو بقت ملفته
وبرضه حطينا صور للوجوهات ماركات كمبيوتر
بس كده

وادى الشكل النهائى

تصميم اليفطه بسيط وسهل ومفيهوش حاجه
طالما انتوا عديتوا من مرحله الكروت الشخصيه حتبقى اليفطه سهله بالنسبه لكم
طبعا اليفط عاوزه شغل اكتر شويه من الكروت بس برضه سهله وبسيطه وبتتعمل على حسب طلب العميل
عميل جيد  طلب يافطه مليانه وفيها صور اولاده وصورته هوه وصور كتير اوى للنشاط اللى حيعمله
نفذ كلامه وهوه حينبسط اوى من اليافطه حتى لو كان التصميم مش عاجبك
جالك عميل ثانى عاوز يافطه شيك وبسيطه وبتعبر بابسط شىء عن نشاط المكان
ابقى مخمخ فيها وخلى اليافطه كلاسيك على قد ما تقدر
عامه اليافطه زى الكروت بتتنفذ على حسب طلب العميل وده اللى عاوز اوصلهولكم بالنسبه لشغل الدعايه
انت بتصمم لاى حد على حسب طلبة ورؤيتة الخاصة مش على حسب رؤيتك إنت
مش مهم انت مقتنع بيها ولا لأ انا مش بقولك امسك المايك وغنى أنا بقولك صمم يافطة .
افتكر دايما ان التصميم اللى بتعمله ده للزبون مش ليك فلازم يكون على مزاجه هوه حتى ولو انت مش مقتنع بيه
لان اقتناعك مش مهم لاغلب العملاء اهم حاجه هما يقتنعوا وعندهم حق فى النقطه دى لان العميل هو صاحب النشاط وهواللى هيشوف اللافتة دى كل يوم وهو رايح الشغل وهو اللى هيدفع والتصميم ده ليه هوه يبقى انت مش متحمل حاجه بعد كده
فيه مصممين بيقولوا لأ انا معملش تصميم وحش من وجهه نظرى علشان العميل عاوز كده
انا باقولهم متبقاش تكتب اسمك على التصميم الوحش وابقى اكتبه على التصميم الجامد
وزى ما قولت قبل كده يا جماعه مكاتب الدعايه دى مجرد بدايه
بعد كده لما تاخد خبره جامده فى المجال ده حتقدر تشتغل فى مكاتب للتصميمات بس
المكاتب دى اللى مش بتطلع اى تصميمات
ساعتها هتلاقى اللى انت عاوزه وهتلاقى ان المطلوب منك تصميمات نضيفه
ارجو ان المعلومه دى تكون وصلت لكم لإن ده سبب مهم من أسباب النجاح والإنتشار + إحترام العميل بالشكل اللائق له لإنى ده مهم جدا .
نيجى بقى للجزء اللى مش بتحبوه
Home work
مطلوب تصميم يافطه لشركة بيع اجهزه كهربائية

اسم : الشركة
البيت الحديث
النشاط: بيع اجهزه منزلية كامله
بيع تلفزيون – ثلاجات – بوتاجازات – ميكروويف – مكنسة كهربائية – خلاط - مراوح

شراء وتبديل المستعمل المستعمل
المطلوب صور لأجهزة كهربائية ولوجوهات ماركات تخص الأجهزة

والكلام يكون واضح

واليافطه تكون ألوان فاتحة
المقاس اللى عاوزكم تصمموا عليه انا مش عاوز مقاس كبير
عرض 2 متر وطول 1 متر وريزليوشن 72 عادى

دكتور/أحمد عوض

رئيس مجلس إدارة شركة زووم للدعاية والإعلان

منقول للإفادة

• غرد
• مشاركة
• إضافة